Արդեն կան որոշումներ, շուտով կլինեն կադրային փոփոխություններ. Արմեն Գրիգորյան. Tert.am

Tert.am-ը գրում է. Բանակում նման դեպքերի բացառման և զգալի արդյունքի հասնելու համար պետք է երկու ուղղությամբ աշխատել՝ ուժեղացնել բանակի կարգուկանոնն ու պայքարել քրեական ենթամշակույթի դեմ: Այս մասին Հանրային ՀԸ եթերում հայտարարել է ՀՀ անվտանգության խորհրդի քարտուղար Արմեն Գրիգորյանը՝ անդրադառնալով բանակում տարեսկզբին զինվորների մահվան դեպքերին:

«Հայ ժողովուրդը յուրահատուկ վերաբերմունք ունի բանակի նկատմամբ և ցանկացած պաշտոնյա հասկանում է, որ բանակում տեղի ունեցած իրադարձություններն ավելի զգայուն են ընդունվում, որովհետև մենք ունենք անվտանգության հանդեպ ավելի զգայուն մոտեցումներ»,-նշել է Գրիգորյանը:

Անդրադառնալով ՀՀ վարչապետի մոտ անցկացված խորհրդակցությանը՝ Գրիգորյանն ասել է, թե դրա նպատակը բանակի խորքային խնդիրները հասկանալն էր:

«Առաջինը կարգուկանոնի ուժեղացումն է, որ թույլ կտա մինիմալի հասցնել կամ բացառել նման դեպքերը, մյուսը քրեական ենթամշակույթն է, որն ազդում է նման երևույթների վրա»,-ասել է Գրիգորյանը՝ նշելով, որ ինչքան էլ բանակում ուժեղացնեն կարգուկանոնը, եթե քրեական ենթամշակույթի դեմ պայքար չլինի, արդյունքներն էլ զգալի չեն լինի:

Հարցին՝ դեպքերի համար կա՞ն կոնկրետ պատասխանատուներ, թե՞ պատճառը միայն քրեական ենթամշակույթն է, ԱԽ քարտուղարը պատասխանել է, որ միայն քրեական մշակույթը մեղավոր դիտարկելով՝ որևէ լուծում չենք գտնի: «Այս պահին կան և հետագայում ևս կլինեն կադրային որոշումներ, որոնք ցույց են տալիս, որ պատասխանատուներ կան նման իրավիճակի համար: Կա քրեական ենթամշակույթ, բայց և կա անհատների պատասխանատվության խնդիր»,-ասել է նա:

Հարցին՝ այսինքն՝ շուտով կլսենք կադրային փոփոխությունների մասին, Գրիգորյանը պատասխանել է՝ այո:

Վերջինս կարևորել է նաև բանակի ընդհանուր բարեփոխման տրամաբանությունը՝ նշելով, որ քրեական ենթամշակույթ ասելով՝ կարևոր դեր է տրվում Ռազմական ոստիկանությանը:

«Ռազմական ոստիկանությունը պետք է իր աշխատանքները կատարի, և այստեղ մենք ունենք բարեփոխումների հայեցակարգ, որը մշակման փուլում է և շուտով հնարավորություն կլինի դրա մասին խոսել»,-նշել է Գրիգորյանը՝ ընդգծելով, թե բանակի բարեփոխման համար տարբեր ուղղություններով աշխատանքներ պետք է տարվեն:

Նա կարևորել է նաև նման դեպքերի բացահայտումը՝ նշելով, թե խնդիրը հստակ է դրված՝ այլևս այնպես չի լինելու, որ ինչ-որ գործի ամբողջական հրապարակայնություն չապահովվի:

«Բարդություններ կան բանակի փակ լինելու և անվտանգության առումով, բայց մեր համոզմունքն այն է, որ պետք է մաքսիմալ այնպես անել, որ հրապարակայնություն ապահովենք. բոլոր գործերը քննվեն, և դրանց արդյունքում կարողանանք նաև այնպիսի քաղաքականություն մշակել, որ բացառենք նման դեպքերը»,-ասել է նա՝ համոզմունք հայտնելով, թե բոլոր գերատեսչությունների համատեղ աշխատանքների արդյունքում կլինեն լավ արդյունքներ:

Անդրադառնալով քրեական ենթամշակույթի դեմ պայքարին՝ ոչ միայն բանակում, Գրիգորյանը նշել է. «Մեր խնդիրն է այնպիսի ուժ ու թափ հաղորդել պետական ինստիտուտներին, որպեսզի նրանք կարողանան ջարդել քրեական ենթամշակույթը և նաև հնարավորություն տալ, որ բանակում և՛ կարգապահությունը և՛ կատարվող մնացած բարեփոխումներն ավելի մեծ ազդեցություն ունենան»:

Մանրամասներն՝ այստեղ