Բաժին : Իրավունք
ՄԻ պաշտպանը ՅՈՒՆԻՍԵՖ-ի պաշտոնյայի հետ քննարկել է երեխաների իրավունքների պաշտպանությանն առնչվող մի շարք հարցեր
Մայիսի 4-ին, Մարդու իրավունքների պաշտպան Անահիտ Մանասյանն ընդունել է Հայաստանում ՄԱԿ-ի մանկական հիմնադրամի (ՅՈՒՆԻՍԵՖ) ներկայացուցիչ Քրիստինե Վայգանդի գլխավորած պատվիրակությանը։ Այս մասին հայտնել է ՄԻՊ-ի գրասենյակը։
Հաղորդագրության համաձայն՝ հանդիպման շրջանակում քննարկվել են Պաշտպանի աշխատակազմի հետ ընթացիկ և հետագա համագործակցության ուղղությունները, երեխաների իրավունքների պաշտպանությանն առնչվող մի շարք հարցեր, այդ թվում՝ Պաշտպանի դերն այդ ոլորտում։
Անահիտ Մանասյանը ներկայացրել է «ՄԻՊ աշխատակազմի Կոնվենցիոն մանդատների ապահովման վարչության երեխաների իրավունքների պաշտպանության բաժնի կողմից իրականացվող մշտադիտարկումների արդյունքում ի հայտ եկած խնդիրները»։
«Երկուստեք կարևորվել է դրանց ուղղությամբ ծրագրերի իրականացումը, ինչպես նաև օրենսդրական և իրավակիրառ պրակտիկայի բարելավումը։
Կողմերն անդրադարձել են նաև բուլինգի հիմնախնդրին և ՅՈՒՆԻՍԵՖ-ի աջակցությամբ ՄԻՊ-ի կողմից դրա վերաբերյալ ընթացիկ փուլում ուսումնասիրության արդյունքում վերհանված խնդիրներին։ Պաշտպանի խոսքով՝ ուսուցիչ-երեխա փոխհարաբերություններն այստեղ շատ կարևոր են և այս տեսանկյունից մանկավարժների կարողությունների զարգացման ուղղված վերապատրաստման դասընթացների անհրաժեշտություն կա։
Անդրադարձ է կատարվել նաև ռազմական գործողությունների հետևանքով տուժած համայնքների երեխաների իրավունքների պաշտպանությանը։ Անահիտ Մանասյանն ընդգծել է՝ սահմանամերձ բնակավայրերն այս տեսանկյունից խոցելի են և ունեն հատուկ ուշադրության կարիք։
Քննարկվել են նաև Պաշտպանին առընթեր երեխաների և երիտասարդների հարցերով հասարակական խորհրդի գործունեության և դրա դերի զարգացման, Երեխաների պաշտպանության միջազգային օրվա՝ հունիսի 1-ի միջոցառումների կազմակերպման հետ կապված հարցեր»,- ասված է հաղորդագրության մեջ։
