Բաժին : Իրավունք
Դատախազությանը երեք անգամ հերքելուց հետո Բարձրագույն դատական խորհուրդը հայտնում է դատական գործերի համակարգչային մակագրումն ապահովելու մասին
Մարտի 17–ին ՀՀ գլխավոր դատախազությւոնը հայտարարեց, որ դատական գործերի մակագրման համակարգի առգրավված բանալիները վերադարձվել են Դատական դեպարտամենտին. «Քրեական գործով առգրավված՝ համակարգի գործարկման և շահագործման առգրավված բանալիները վերադարձվել են, և ՀՀ դատական դեպարտամենտի ղեկավարին հայտնվել է, որ մակագրման համակարգը կարող է վերագործարկվել»։
Բարձրագույն դատական խորհուրդը հերքեց այն, նշելով, որ համակարգի գործարկման և շահագործման առգրավված բանալիները չեն վերադարձվել, ինչին ի պատասխան Դատախազությւոնը հրապարակեց փաստաթուղթ առ այն, որ բանալիները վերադարձվել են և այն ստացել է Դատական դեպարամենտի աշխատակիցը։
Դրանից հետո, մարտի 18–ին ևս մեկ անգամ Բարձրագույն դատական խորհուրդը հայտարարություն տարածեց, որ ժամը 18-00-ի դրությամբ Դատական դեպարտամենտ քրեական գործով առգրավված՝ համակարգի գործարկման և շահագործման բանալիները կամ դրանց վերադարձման վերաբերյալ որևէ գրություն մուտք չի եղել:
Երրորդ անգամ Բարձրագույն դատական խորհուրդը հայտարարեց համակարգի գործարկման անհնարինության մասին, նշելով, որ էլեկտրոնային մակագրման համակարգի գործարկման և շահագործման բանալիները Դատական դեպարտամենտ 21.03.2022 թվականի ժամը 18:00-ի դրությամբ դեռևս չեն վերադարձվել:
Չնայած նրան, որ Դատախազությունը փաստաթուղթ էր հրապարակել ստացման վերաբերյալ, Բարձրագույն դատական խորհուրդը երրորդ հերքումից հետո այսօր հայտնում է դատական գործերի էլեկտրոնային մակագրման համակարգի գործարկմանն ուղղված քայլերի մասին, և չի հստակեցնում, թե ինչու էր նախկինում հերքում։
Բարձրագույն դատական խորհրդի՝ այսօր տարածած հայտարարության մեջ ասվում է«ՀՀ գլխավոր դատախազությունը ՀՀ Բարձրագույն դատական խորհրդի աշխատակազմ՝ դատական դեպարտամենտին տեղեկացրել է դատական գործերի համակարգչային մակագրման ծրագրի վերագործարկման թույլատրելիության և քննվող քրեական գործով դրա համար խոչընդոտների բացակայության մասին:
Ներկայումս «Դատական համակարգ» համակարգչային ծրագրի հեղինակ և սպասարկումն ապահովող կազմակերպության և դատական դեպարտամենտի մասնագետների կողմից կատարվում են նախապատրաստական անհրաժեշտ աշխատանքներ համակարգի ամբողջական շահագործումն ապահովելու համար:
Մենք շահագրգիռ ենք մակագրման համակարգչային ծրագրի արագ վերագործարկման հարցում»: