Բաժին : Տնտեսություն/Բիզնես
ԵՄ-ն մտադիր է աստիճանաբար հրաժարվել ռուսական նավթից, գազից և ածխից. հարցն այսօր կքննարկվի Վերսալի գագաթնաժողովում. Reuters
Եվրամիության երկրները մտադիր են աստիճանաբար հրաժարվել ռուսական նավթի, գազի և ածուխի գնումներից, որպեսզի նվազեցնեն կախվածությունը Ռուսաստանի էներգետիկ ռեսուրսներից։ Այս մասին ասված է այսօր Վերսալում մեկնարկելիք ԵՄ գագաթնաժողովի հռչակագրի նախագծում։ Փաստաթղթից հատվածներ է մեջբերում Reuters-ը։
«Բախվելով աճող անկայունության, ռազմավարական մրցակցության և անվտանգության սպառնալիքներին՝ որոշել ենք ավելի շատ պատասխանատվություն ստանձնել մեր անվտանգության համար և հետագա վճռական քայլեր ձեռնարկել՝ ամրապնդելու մեր եվրոպական ինքնիշխանությունը, նվազեցնելու մեր կախվածությունը (ռուսական էներգիայից) և 2030 թվականի համար նոր աճի և ներդրումային մոդել մշակելու համար»,- ասվում է փաստաթղթի նախագծում։
Գործակալությունը նշում է, որ ԵՄ առաջնորդները միասնական ժամկետ չեն սահմանի ռուսական էներգակիրներից հրաժարվելու համար, քանի որ եվրոպական տարբեր երկրների համար դրանցից կախվածության աստիճանը մեծապես տարբերվում է։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
