2022 թ․ ավարտին կառավարության պարտքի չափը կկազմի ՀՆԱ–ի 60,2 տոկոսը․ Տիգրան Խաչատրյան

2022 թվականին յոթ տոկոս տնտեսական աճի թիրախը որոշակիորեն բարձր է տնտեսական աճի պոտենցիալից, և դրան հասնելու ուղիները պահանջում են հետևողական ջանքեր, տարբեր գնահատականներով ՀՀ տարեկան տնտեսական աճի պոտենցիալը գտնվում է 4,5 տոկոսի սահմաններում։ Այս մասին Ազգային ժողովում 2022 թվականի պետական բյուջեի նախագիծը ներկայացնելիս ասաց ֆինանսների նախարար Տիգրան Խաչատրյան

«2022 թվականի հիմնական աճին հիմնականում կնպաստեն ծառայությունները, արդյունաբերությունը և շինարարությունը, իսկ ծախսային բաղադրիչների կողմից վերջնական սպառման աճը, ապրանքների և ծառայությունների արտահանումը, ինչպես նաև պետական և մասնավոր ներդրումների աճը»,–ասաց նա։ Այսպիսով` նա նշեց, որ  Կառավարությունը թիրախավորում է երկարատև բարձր տնտեսական աճի ապահովումը` տարեկան առնվազն 7 տոկոս, իսկ բարենպաստ արտաքին միջավայրի դեպքում՝ 9 տոկոս։

Տիգրան Խաչատրյանն ասաց, որ 2022 թվականի պետական բյուջեի նախագծով առաջնային թիրախ է սահմանվել անվտանգային հարցերի, կրթական համակարգի, ինչպես նաև ներառական և որակյալ ենթակառուցվածքների զարգացման հարցերի լուծումը։  

Նախարարը հայտնեց, որ 2022 թվականի ավարտին կառավարության պարտքի չափը կկազմի ՀՆԱ–ի 60,2 տոկոսը, որի 69 տոկոսը կկազմի արտաքին պարտքը, իսկ 31 տոկոսը՝ ներքին պարտքը։